Dungan sa selebrasyon sa ika-128th Independence Day, gipahigayon sa DOLE ang Trabaho Agad Job Fair diin gatusan ka mga aplikante ang mitambong aron mangita og trabaho ug makabenepisyo sa mga serbisyo sa gobyerno nga gipangunahan ni DOLE Provincial Director Elamsalih Ungad sa Gaisano grand, Ipil, Zamboanga Sibugay karong adlawa June 12,2026.
Kabahin sa kalihokan ang One-Stop Shop nga gitambongan sa nagkadaiyang ahensya sa gobyerno sama Redcross, SSS, PhilHealth, Pag-IBIG Fund, PSA, ug uban pa, aron mapadali ang pagproseso sa mga dokumento ug mga kinahanglanon sa mga aplikante.
Gawas sa job fair, gipahigayon usab ang ceremonial turnover sa mga ayuda ug kagamitan alang sa mga fisherfolk isip suporta sa ilang panginabuhian ug pagpalambo sa sektor sa pangisda sa probinsya.
Sumala sa mga opisyal, ang maong kalihokan nagpakita sa paningkamot sa gobyerno sa paghatag og trabaho, serbisyo, ug tabang panginabuhi ngadto sa katawhan isip kabahin sa tinuod nga kahulugan sa kagawasan.
