Nagpadayon ang pag-abli sa bag-ong merkado alang sa mga mangga sa Guimaras human unang gipadala ngadto sa Europa ug Hong Kong ang 200 ka kilo nga preskong mangga gikan sa Kokomojo Mango Farm sa Sibunag, Guimaras.
Sumala sa Department of Agriculture o DA, 50 ka kilo niini ang ipadulong sa Netherlands, 50 ka kilo sa Belgium, ug 100 ka kilo sa Hong Kong isip kabahin sa kampanya sa gobyerno sa pagpaila sa kalidad sa manggang Pilipino ngadto sa internasyonal nga merkado.
Gipasabot sa DA nga ang mga kargamento paingon sa Belgium ug Netherlands magsilbing promotional o “patikim” exports aron mas mailhan sa mga potensyal nga pumapalit ug stakeholders sa Europa ang Guimaras mangoes, diin nagkataas ang panginahanglan sa mga premium tropical fruits.
Samtang, ang ipadala ngadto sa Hong Kong ipanghatag ngadto sa mga diplomat ug mga dinapit nga bisita atol sa pagsaulog sa ika-127 nga anibersaryo sa Independence Day sa Pilipinas.
Gisuportahan sa Bureau of Plant Industry o BPI ang maong export pinaagi sa teknikal, laboratoryo ug regulatory services aron masiguro nga nakasunod ang mga mangga sa internasyonal nga food safety ug plant health standards.
Matud pa ni Agriculture Secretary Francisco Tiu Laurel Jr., importante ang pagpalapad sa export market tungod kay makahatag kini og dugang kita sa mga mag-uuma ug makahimo usab og trabaho sa sektor sa pagproseso, logistics, packaging ug distribusyon.
Dugang sa DA, kabahin kini sa mas halapad nga paningkamot sa gobyerno nga mapalapdan ang eksportasyon sa mga produktong agrikultural sa Pilipinas ngadto sa mga premium nga merkado sa kalibutan.
Photo Courtesy: Philstar
