Giablihan pag-usab sa Pilipinas ang pag-export sa mga preskong pinya ngadto sa United Arab Emirates (UAE) bisan pa man sa nagpadayong krisis sa shipping ug transportasyon sa rehiyon sa Middle East.
Sumala sa Department of Agriculture (DA), malampusong gipadala niadtong Hunyo 6, 2026, ang unang shipment sa 18 metric tons o 1,500 ka kahon sa MD2 pineapples gikan sa Tampakan, South Cotabato, nga gilaumang modunggo sa Khorfakkan Port sa UAE karong Hunyo 25 o 26.
Nadayon ang maong makasaysayanong pagpadala sa produkto bisan paman sa taas nga freight cost ug dakong kalisod sa shipping tungod sa nagpadayong Red Sea crisis. Gipahayag sa DA nga kining maong lakang kabahin sa mas gipalapad nga inisyatiba sa gobyerno aron mapadako ang merkado sa mga produktong agrikultura sa Pilipinas sa gawas sa nasod ug aron direktang mapataas ang kita sa mga lokal nga mag-uuma ug makamugnag dugang trabaho alang sa mga trabahante sa maong sektor.
Nakatabang og dako niini nga kalamboan ang naunang pirmahanay sa free trade agreement tali sa Pilipinas ug UAE, nga maoy naghatag og mas sayon nga dalan sa pagsulod sa mga kalidad nga produkto gikan sa nasod ngadto sa Middle East.
Photo Courtesy: agroeden
