Gidid-an sa gobyerno sa China sa pagsulod sa mainland China, Hong Kong, ug Macau si Philippine Defense Secretary Gilberto “Gibo” Teodoro Jr., uban sa iyang asawa ug anak.
Gawas sa travel ban, gidili usab sa Beijing ang bisan unsang transaksyon o interaksyon tali sa mga kompanya sa China ug sa pamilya sa kalihim. Ang maong lakang gihimo sa China tungod sa giingong “false statement” ni Teodoro batok kanila, nga sumala sa Beijing makadaot sa relasyon sa duha ka nasod ug sa ilang interes, bisan pa man kung wala gitino sa China kung unsang partikular nga pahayag ang ilang gipasabut.
Sa pagkakaron, wala pay opisyal nga pamahayag ang hepe sa Depensa sa Pilipinas kalabot sa gipahamtang nga mga silot sa China, apan daan na kining niingon sa mga nangaging interview nga wala siyay plano nga mobisita sa maong nasod. Ang maong personal nga silot batok sa kalihim nagpakita lamang sa nagkagrabe nga tensyon tali sa Pilipinas ug China tungod sa panag-ilog sa teritoryo sa West Philippine Sea, diin giangkon sa China ang hapit tanang bahin sa maong kadagatan.
Nisamot pa ang kainit sa maong isyu human nisang-at og bag-ong diplomatikong reklamo ang Pilipinas batok sa China bag-ohay lang tungod sa giingong illegal nga presensya sa usa ka barko sa China sa dapit nga gilalisang lugar.
Photo Courtesy: Gilberto Teodoro Jr, DND file photo
