Gipasalig sa DepEd nga dili usa pabalikon sa mga eskwelahan nga naapektuhan linog sa Mindanao ang mga estudyante kung dili masiguro ang ilang kaluwasan. Giingon ni Education Secretary Sonny Angara nga gihulat pa nila ang resulta sa pagsusi sa DPWH aron masiguro nga lig-on ug luwas na ang mga bilding.
Sumala sa DepEd, anaa sa 4,000 ka school building ang nadaot tungod sa linog. Gipahibalo nga ang mga engineer maoy motan-aw kung unsang mga eskwelahan ang kinahanglan ayohon ug unsa ang kinahanglan tukuron pag-usab.
Sumala pa, gimando ni Presidente Ferdinand Marcos Jr. ang dali nga pag-ayo sa mga nadaot nga eskwelahan. Nakapagawas na ang DepEd og P21 milyon nga badyet alang sa mga apektadong eskwelahan.
Samtang giayo pa ang mga bilding, magpadayon ang pagtuon sa mga estudyante pinaagi sa mga learning module nga ilang magamit bisan naa sa balay. Matud sa DepEd, importante nga magpadayon ang pag-eskwela sa mga bata samtang gisiguro ang ilang kaluwasan tungod sa kalamidad.
Photo Courtesy: ABS-CBN
