Patay ang usa ka pasahero samtang usa ang angol human maaksidente ang usa ka Coca-Cola panel truck sa National Road sa Upper Sabang, Barangay Poblacion, Kaputian District, Island Garden City of Samal, Davao del Norte alas 2:30 niadtong nakalabay nga adlaw.
Base sa report sa kapulisan, ang nalambigit sa aksidente mao ang usa ka pula nga Hino truck nga gimaneho ni Nilo Pancho, 51-anyos, residente sa Doña Pilar, Sasa, Davao City. Kauban niya sa sakyanan sila Rodolfo Alfon, 31-anyos; Kevin Orotojan, 30-anyos; ug Jhon Mark Navarro, 27- anyos.
Sa inisyal nga imbestigasyon, nahibal-an nga nagpadulong paubos ang trak sa usa ka bakilid nga bahin sa karsada sa dihang kalit matod pa napakyas ang preno. Tungod niini, wala na makontrolar sa drayber ang sakyanan.
Atol sa insidente, milukso gikan sa trak ang pasahero nga si Alfon, samtang padayon nga nagdagan ang sakyanan hangtod nga misalpok kini sa daplin sa dalan.
Dali nga gidala sa mga responder sa CDRRMO-IGaCoS ngadto sa Davao del Norte Hospital–IGaCoS Zone sila Alfon ug Kevin Orotojan aron matambalan. Apan, gideklarar nga dead on arrival si Alfon tungod sa grabeng samad nga iyang naangkon.
Samtang ang usa ka biktima stable na ang kahimtang ug nagpadayon usab ang imbestigasyon sa kapulisan aron matino ang hinongdan sa maong aksidente.
Photo Courtesy : Adobe Stock
