Girekomenda sa Department of Agriculture (DA) ang pagpalugway sa P50 kada kilo nga maximum suggested retail price (MSRP) sa bugas nga nakatakdang lang ipatuman karong Hunyo 30.
Matod ni Palace Press Officer Claire Castro, padayon nga gitun-an sa DA ang posibilidad sa extension aron mapadayon ang barato ug abot-kayang presyo sa bugas alang sa mga konsumante.
Apan, gipasabot niya nga wala pa’y pinal nga desisyon tungod kay kinahanglan pa kining susihon sa National Price Coordinating Council ug aprubahan sa Presidente.
Samtang, gikompirmar usab sa Malacañang nga adunay mga rice retailers nga kasamtangang giimbestigahan tungod sa posibleng paglapas sa gipatuman nga price cap.
Nagpagawas na usab ang DA og notices ngadto sa pipila ka mga establisemento nga naapil sa ilang imbestigasyon gumikan sa wala pagsunod sa pagpatuman sa price cap.
Gidasig usab sa gobyerno ang publiko nga ireport dayon ang mga negosyante nga posibleng nag-abuso o wala nagtuman sa gitakdang presyo aron mapadayon ang proteksyon sa mga konsumante ug masiguro ang patas nga presyo sa merkado.
