Dungan sa pagsaulog sa World Blood Donor Day karong umaabot nga Hunyo 14, hugtanong giila ang kabayani sa mga indibidwal nga boluntaryong nagadonar og dugo aron makasalbar og daghang kinabuhi.
Karong tuiga nga selebrasyon sa World Blood Donor Day, nakaangkla sa temang “One Drop of Humanity. Give Blood. Save Lives.”
Sumala pa ni Roeben Dem Perez, Medical Technologist sa Regional Blood Center Northern Mindanao nga padayon ang ilang pag-ila ug dakong pasalamat sa mga blood donors sa kanunay nga paghatag og dugo nga dakong tabang aron nga makasalba silag kinabuhi sa ubang tao.
Matod pa ni Perez, perming in demand ang dugo alang sa medical purposes, busa padayon sab ang ilang pag-awhag sa katawhan nga magdonar sa ilahang dugo.
Gipasabot sab niya nga sa higayon nga gamiton ug kinahanglanon na ang dugo, libre ang mismong dugo apan nagapangayo sila og processing fee tungod kay ang ilahang madawatan nga blood donation, ginaagi pa nila kini sa testing ug makuting proseso aron nga masigurong luwas kini sa bisan unsang posibleng makatakod nga sakit.
Photo courtesy: Northern Mindanao Regional Blood Center
