Gitutokan sa Philippine National Police (PNP) ang pagpatuman sa seguridad alang sa ika-128 nga Adlaw sa Kagawasan karong adlawa, Hunyo 12,2026, bisan pa man nga wala silay namonitor nga bisan unsang seryosong hulga.
Sumala ni PNP chief Police General Jose Melencio Nartatez Jr., naka-alerto ang ilang mga sakop sa tibuok nasod aron mabantayan ang nagkadaiyang kalihokan sama sa flag-raising, parada, ug mga kultural nga programa ubos sa temang “Kalayaan, Kinabukasan, Kasaysayan.”
Aron masiguro ang hapsay nga selebrasyon, nakig-alayon ang kapulisan sa mga lokal nga kagamhanan ug uban pang mga ahensya. Gipasabot ni Nartatez nga dako ang iyang pagsalig sa mga commander sa ground nga mohimo og dinaliang kausaban sa seguridad depende sa dagan sa sitwasyon ug intelligence reports nga ilang makuha.
Sa Metro Manila palang, gibana-bana nga 12,000 ka mga pulis ug force multiplier ang ipakatag sa mga estratehikong lugar sama sa Rizal Park, dapit sa Malacañang, ug US Embassy. Gihatagan usab og hugot nga pagtagad ang seguridad sa Senado ug Kamara isip pagpangandam sa mga posibleng protesta tungod sa nagpadayong tensiyon sa politika sa nasod.
Photo courtesy: Philippine National Police
