Bukas ang Senate Committee on Agriculture, ubos sa pamunoan ni Sen. Francis “Kiko” Pangilinan, nga magpahigayon og imbestigasyon bahin sa giingong overimportation sa sibuyas ug uban pang produktong agrikultural sa nasod.
Kini nga lakang gihimo human sa gipahigayon nga inspeksyon sa 26-ka container van sa Manila International Container Port nga adunay sulod 650,000 ka kilo nga imported red onions, nga nagdala og kabalaka sa dako ug dautang epekto niini sa panginabuhian sa mga lokal nga mag-uuma.
Gawas sa isyu sa sobra nga pag-import, tutukan usab sa komite ang mga taho nga giingong gimonopolyo sa pipila ka traders ang mga cold storage facility, hinungdan nga dili kini mapahimuslan sa mga lokal nga producer ug mangingisda. Tungod niini, ipatawag sa Senado ang mga indibidwal nga nahatagan og import permit ug ang mga operator sa mga pasilidad aron mohatag sa ilang katin-awan.
Aron masulbad ang problema, gihangyo ni Pangilinan ang Department of Agriculture (DA), Bureau of Plant Industry, ug Philippine Statistics Authority nga ayuhon ug ipatugma ang ilang mga datos aron malikayan ang dako nga pag-import sa umaabot. Nagpasidaan pa ang senador nga andam niyang i-hold o idelay ang pag-apruba sa budget sa mga ahensya kon mapakyas sila sa paghimo og ensaktong sistema batok sa overimportation.
Photo courtesy: Senator Kiko Pangilinan
