Mikunhod og 17 porsyento ang net inflows sa foreign direct investments (FDI) sa Philippines ngadto sa $1.72 bilyon sa unang tulo ka bulan sa 2026 gikan sa $2.07 bilyon sa samang panahon niadtong 2025. Sumala sa Bangko Sentral ng Pilipinas (BSP), kini ang pinakaubos nga unang kwarter nga rekord sukad pa sa 2020.
Ang pagkunhod gipasangil sa kawalay kasigurohan sa kalibutanong ekonomiya nga nakaapekto sa pagsalig sa mga mamumuhunan ug nagpahinay sa ilang mga desisyon sa pagpamuhunan.
Ang dakong hinungdan sa pag-ubos sa FDI ang 22.7% pagkunhod sa net investments sa debt instruments, ilabi na sa intercompany borrowings. Bisan pa niini, misaka og 13.1 porsyento ang net equity capital ngadto sa $337 milyon, apan mikunhod ang reinvested earnings ngadto sa $206 milyon.
Sumala ni Robert Dan Roces, dili kini pasabot nga nawad-an og pagsalig ang mga investor sa Pilipinas, kondili usa lamang ka timailhan sa ilang pag-amping tungod sa nagpadayon nga kawalay kasigurohan sa global nga ekonomiya.
Bisan og ubos ang kinatibuk-ang numero sa unang kwarter, nagpakita og pagbangon ang bulan sa Marso diin misaka ang net FDI inflows ngadto sa $611 milyon gikan sa $485 milyon sa miaging tuig. Ang nag-unang tinubdan sa equity investments ang Japan, United States, ug Singapore, nga kadaghanan gipuhunan sa manufacturing, financial ug insurance, ug real estate sectors.
Matod ni Roces, mahimong hinay-hinay nga mosaka pag-usab ang FDI kung moayo ang kondisyon sa financing, apan importante gihapon ang lig-on nga mga polisiya ug maayong imprastraktura aron madani ang dugang nga mga mamumuhunan.
Photo courtesy:Dreamstime.com
