Gidakop sa kapulisan ang upat ka sundalong Amerikano human sa usa ka komosyon nga nahitabo sa distrito sa Itaewon sa Seoul nga miresulta sa pagkaangol sa duha ka Koreanong lalaki.
Sumala sa Yongsan Police Station, gidakop ang upat ka miyembro sa militar sa Estados Unidos ug duha ka Koreanong lalaki tungod sa kasong joint assault human sa away nga mibuto sa maong iladong nightlife district sa sentro sa Seoul.
Ang mga sundalo nga anaa sa 20-anyos ug nakabase sa Camp Casey, giingong miduol sa duha ka Koreanang babaye ug naghangyo nga mokuyog kanila.
Misamot ang tensiyon sa dihang mibalibad ang mga babaye apan mipadayon gihapon sa pagpakigsulti ang mga sundalo, nga maoy hinungdan sa panaglalis tali kanila ug sa duha ka Koreanong lalaki nga kauban sa mga babaye.
Dugang pa, duha ka laing Koreanong lalaki nga misulay unta sa pagpataliwala sa away giingong giatake usab sa mga sundalong Amerikano ug gidala sa tambalanan.
Matod sa kapulisan, duha sa upat ka sundalo ang giapas usab tungod sa injury charges gumikan sab sa ilang giingong pagpanapat sa duha ka lalaki nga misulay sa pagpahunong sa komosyon.
Human sa interogasyon sa mga nalambigit, gitugyan sa kapulisan ang upat ka sundalo ngadto sa military police sa Estados Unidos subay sa kasabutan nga nagdumala sa mga sundalong Amerikano nga nakabase sa South Korea.
Padayon pa sa pagkakaron ang imbestigasyon sa kapulisan aron masuta ang tibuok kahimtang ug hinungdan sa maong insidente.
Photo Courtesy:Inquirer.net
