Nipaambit si Ellen Adarna sa pipila ka mga istorya bahin sa iyang pagkabata ug kinabuhi sa wala pa siya nahimong usa ka sikat nga personalidad atol sa iyang guesting sa programa nga Kuan On One ni Melai Cantiveros.
Sumala ni Ellen, siya ang kamagulangan ug bugtong babaye sa ilang pamilya. Nagdako siya ubos sa pag-atiman sa iyang lola, nga maoy tag-iya sa Temple of Leah. Matod niya, tungod kay siya ra ang babaye sa pamilya, dako ang pag-atiman ug paggiya nga iyang nadawat gikan sa iyang lola.
Gipadayag usab ni Ellen nga sa edad nga 13-anyos, nilayas siya sa ilang balay. Sa dihang nakaabot siya og 17-anyos, nakatrabaho siya isip Human Resources personnel sa usa ka BPO company sa Cebu.
Nahinumduman usab ni Ellen ang usa sa mga silot nga gipahamtang kaniya sa iyang amahan tungod sa iyang pagka-badlongon. Imbis kastigohon og grabe, gipasakay siya og jeepney apan uban gihapon ang iyang yaya aron masiguro ang iyang kaluwasan. Gikataw-an usab ni Ellen ang paghisgot nga schoolmate diay niya kaniadto sa kolehiyo si Paul Jake Castillo.
Usa sa mga pahimangno nga dili niya malimtan gikan sa iyang amahan mao ang, “No man is worth your tears.” Dugang pa niini, giingnan usab siya nga, “Ayaw lang pagminyo, panganak lang. Dili ka kinahanglan og asawa, panganak lang,” usa ka tambag nga nagpabiling nahinumdoman ni Ellen hangtod karon.
Ang maong interbyu naghatag og mas lawom nga pagtan-aw sa personal nga kinabuhi ni Ellen ug sa mga leksyon nga iyang nadala gikan sa iyang pamilya.
Photo Courtesy:Tatler Asia
