Nagpasidaan ang Philippine Institute of Volcanology and Seismology (PHIVOLCS) nga posibleng moabot sa magnitude 8.2 ang kusog sa linog nga mahimong mahitabo sa mga lugar nga duol sa unom ka aktibong trenches sa nasud.
Matod ni PHIVOLCS Director Teresito Bacolcol, lakip sa mga aktibong trenches ang Philippine Trench, East Luzon Trough, Manila Trench, Negros Trench, Sulu Trench ug Cotabato Trench.
Ang pasidaan migula human sa magnitude 7.8 nga linog nga mitay-og sa pipila ka bahin sa Mindanao niadtong Lunes, nga gituohang naggikan sa Cotabato Trench ug maoy pinakakusog nga linog nga natala sa Pilipinas karong tuiga.
Gipahinumdoman sa PHIVOLCS ang mga lumulupyo duol sa baybayon nga magmatngon ug mobakwit dayon ngadto sa mas taas nga lugar kon makasinati og kusog nga pag-uyog sa yuta.
Lakip sa natural nga timailhan sa posibleng tsunami ang kusog nga linog, kalit nga pagsaka o pagkunhod sa lebel sa dagat, ug kusog nga dinahunog gikan sa kadagatan.
Alayon niini giawhag sa PHIVOLCS ang publiko nga magpabiling alerto ug mosunod sa mga opisyal nga pasidaan aron malikayan ang posibleng peligro sa panahon sa kalamidad.
Photo Courtesy: PHIVOLCS
