Usa ka karaang dokumento gikan sa panahon sa mga Kastila ang naghatag og bag-ong kahayag sa misteryosong sugilanon sa Biringan, ang giingong syudad sa mga engkanto nga dugay nang nahimong bahin sa kultura ug mga istorya sa Samar.
Sumala ni Jhonil Bajado, usa ka history professor sa Samar State University, adunay nakit-ang dokumento nga naghisgot sa usa ka lugar nga gitawag og “Sitio de Beringan,” nga posibleng maoy tinuod nga gigikanan sa sikat nga sugilanon sa Biringan.
Gipadayag ni Bajado nga ang maong dokumento usa ka kasulatan sa pagbaligya og yuta nga gihimo tali sa 1921 ug 1925, diin klarong gihisgutan ang Sitio de Beringan isip tinuod nga lokasyon sa usa ka yutang gibaligya. Matod niya, nagpakita kini nga adunay aktwal nga komunidad nga naglungtad kaniadto sa maong dapit ug dili lamang kini produkto sa imahinasyon.
Gipasabot usab sa history professor nga posible nga nawala ang maong lugar sa modernong mga mapa tungod sa pagbag-o sa mga utlanan sa mga lungsod, pagbiya sa mga residente, ug paglabay sa panahon. Sa kadugayan, ang tinuod nga lugar nahimong sentro sa mga sugilanon hangtod nga nahimo kini nga misteryosong syudad sa mga engkanto nga nailhan karon isip Biringan.
Bisan pa niini, gipasiugda ni Bajado nga wala kini nagpasabot nga napamatud-an na ang paglungtad sa usa ka supernatural nga syudad. Hinuon, naghatag kini og ebidensya nga adunay tinuod nga lugar nga gitawag og Beringan nga posibleng nahimong ugat sa usa sa labing iladong mga sugilanon sa Samar.
Giduso usab niya ang mga historyador ug lokal nga mga opisyal nga magpadayon sa pagtuki sa karaang mga mapa ug rekord aron mas masabtan pa ang kasaysayan sa mga nawala nga komunidad sa Samar.
Photo Courtesy: Esquire Philippines
