Mipadayag si Senate President Pro Tempore Sherwin Gatchalian sa iyang pagsupak sa gisugyot nga power-sharing arrangement sa Senado. Matod ni Gatchalian, dili kini mahimo tungod kay usa ra ang opisyal nga napili ug giila sa June 3 session isip liderato sa Senado, busa klaro na ang mandato kung kinsa ang mangulo sa chamber.
Ang isyu mitumaw human sa suhestiyon nga mahimong mag-uban ang mga lider sa pagpirma sa mga dokumento aron malikayan ang pagkaparalisa sa operasyon sa Senado samtang wala pa masulbad ang internal nga liderato.
Apan mipugos si Gatchalian nga angay sundon ang napili nga liderato base sa resulta sa sesyon ug dili ang power-sharing nga walay pormal nga mandato.
Gipasiugda usab niya nga klaro ang lagda sa Senado kalabot sa impeachment proceedings diin ang Senate President ang mopreside sa impeachment trial ug kung wala kini, ang Acting Senate President ang mopuli ug magdumala sa proseso.
Matod pa ni Gatchalian, by operation of rules, ang Acting Senate President ang mahimong presiding officer sa impeachment trial kung wala ang Senate President.
Nagpadayon usab ang diskusyon sa Senado kalabot sa mga pending nga lakang ug posibleng special session aron matubag ang mga importanteng isyu sama sa promosyon sa mga heneral ug uban pang legislative matters.
Photo Courtesy: PNA
