Nagplano ang gobyerno sa Japan nga magtukod pag-usab og duha hangtod lima ka nuclear reactors pagsugod sa dekada 2040 isip kabahin sa pagpalig-on sa suplay sa kuryente sa nasod.
Kini ang unang higayon nga nagtakda ang Japan sa pag-ilis sa mga nuclear reactors sukad sa grabeng aksidente sa Fukushima nuclear power plant niadtong 2011.
Sumala sa Ministry of Economy, Trade and Industry, gikinahanglan ang bag-ong mga reactor tungod kay daghan sa kasamtangang mga planta ang moabot na sa ilang katapusang operasyon sulod sa sunod nga mga dekada.
Plano usab sa gobyerno nga magdugang pa og siyam ka reactors sa dekada 2050, nga magdala sa kinatibuk-ang ihulip nga reactors ngadto sa 11 hangtod 14.
Bisan sa maong plano, gipasiugda sa gobyerno nga ang luwas ug hapsay nga pagdekomisyon sa Fukushima nuclear plant mao gihapon ang ilang labing taas nga prayoridad, samtang padayon usab ang pagpalambo sa mas luwas ang sunod nga henerasyon nga nuclear reactors.
Target sa Japan nga mapataas ngadto sa 20 porsyento ang bahin sa nuclear energy sa nasudnong suplay sa enerhiya pag-abot sa 2040, gikan sa 9.4 porsyento niadtong 2024.
Photo Courtesy: Atomic Archive
