Nadakpan sa hiniusang buy-bust operation sa Philippine Drug Enforcement Agency o PDEA Davao del Sur ug Davao del Sur Police Provincial Office–Provincial Drug Enforcement Unit ang usa ka City Security Unit (CSU) personnel sa Dakbayan sa Digos tungod sa gituohang pagbaligya og ilegal nga droga.
Nahitabo ang operasyon alas 3:03 sa hapon niadtong Hunyo 8, 2026 sa Bus Terminal, Purok 7-A, Barangay Aplaya, Digos City, diin nasikop ang suspetsadong giila nga si alyas “Bossing,” 64- anyos, minyo ug residente sa Barangay Zone I, Digos City.
Narekober gikan sa iyang posesyon ang mga sachet sa gituohang shabu nga adunay kinatibuk-ang gibug-aton nga 11.2 gramos ug gibanabanang kantidad nga P76,160.
Ang suspetsado, nga usa ka job order personnel sa City Government of Digos ug giila usab nga High Value Target o HVT, mag-atubang og kaso sa paglapas sa Sections 5 ug 11, Article II sa Republic Act 9165 o Comprehensive Dangerous Drugs Act of 2002.
