Gitangtang na sa Indonesia ang tsunami warning niining Lunes, pipila ka oras human magmando og pagbakwit sa northern areas nga posibleng maigo sa tsunami sunod sa magnitude 7.8 nga linog sa habagatang bahin sa Pilipinas.
Matod sa Meteorology, Climatology, and Geophysics Agency (BMKG), natapos na ang tsunami warning human ang 4.5 ka oras sukad sa pagpagawas niini. Narekord sa ahensya ang gagmay nga mga balod sa tsunami sa dili mominos siyam ka dapit sa Indonesia, diin ang labing taas niabot sa 2.4 feet sa Sangihe Island.
Una niini, gimanduan ang mga residente sa mga high-risk nga dapit sama sa Manado (North Sulawesi), amihanang Gorontalo, ug Sangihe Island nga mobakwit paingon sa mas luwas nga dapit. Subay sa taho, nabati lamang ang pagtay-og sa Indonesia sulod sa duha hangtod tulo ka segundo ug nagpabiling luwas, kalmado, ug kontrolado ang sitwasyon.
Gitambagan usab ang publiko nga likayan una ang mga baybayon ug suba, ug hunongon ang bisan unsang kalihokan sa katubigan. Ang Indonesia ug ang mga silingang nasod niini kanunay makasinati og linog tungod sa lokasyon niini sa Pacific “Ring of Fire,” diin nahitabo ang grabeng seismic activity.
Photo courtesy: Lumbee News Network
