Kung magreklamo ka nga sakit imong kamot sa paghugas plato… hulata sa ni!. Usa ka martial arts master sa China nga si Zhang Longxiang, nakapahibulong sa publiko human ang iyang palad nahimong doble ka baga kumpara sa ordinaryong tawo—murag pandesal nga bagong luto!
Sulod sa kapin 20 ka tuig, gipraktis ni Zhang ang “Iron Sand Palm,” usa ka teknik sa Shaolin Kung Fu nga nagkinahanglan og grabe nga disiplina… ug grabe pud ka sakit!
Matod pa niya, kada adlaw kinahanglan niya hapakon ang sandbag hangtod 6,000 ka beses. Oo, sakto ka—6,000! Murag nag gym, pero kamot ang gi-workout!
Resulta? Ang iyang palad karon moabot og 8 sentimetros ang kabaga—nga bisan ipatong nimo imong duha ka kamot, di gihapon kaabot!
Dili lang kutob sa porma, kay kaya usab niya mabali ang tisa ug malubong ang lansang sa kahoy gamit lang ang kamot—walay martilyo, walay drama!
Bisan pa ana, giingon ni Zhang nga walay shortcut sa kalampusan—kundili puro paningkamot ug pag-antos. Ug klaro kaayo, iyang kamot mismo ang ebidensya!
Busa kung sa sunod moingon ka nga “kapoy na kaayo ko,” hinumdumi si Zhang, nga ikaw kapoy lang, siya kamot na gyud ang giusab.
Photo courtesy: Oddity Central
