Gisaulog sa aktres nga si Kaye Abad ang iyang pagka-cancer free pinaagi sa pagpapatik og pink ribbon tattoo, simbolo sa breast cancer awareness ug suporta sa mga nakigbisog batok sa sakit.
Gibutyag sa tattoo artist nga si Chow Abinales nga ang tattoo nagrepresentar sa hilom nga pakigbisog ug kadaugan sa usa ka cancer survivor. Gisuportahan usab kini sa bana ni Kaye nga si Paul Jake Castillo.
Samtang gisaulog ang Cancer Survivors Month, nagpaambit si Kaye og mensahe sa ubang survivors, nga nagpasalamat sa kusog ug paglaum nga ilang gipakita bisan sa mga pagsulay nga ilang naagian.
Niaging Mayo, sa iyang ika-44 nga adlawng natawhan, gibutyag ni Kaye nga cancer-free na siya human makit-an ang iyang breast cancer pinaagi sa mammogram niadtong Enero 2025. Ang iyang pagpatambal ug konsultasyon gihimo sa Singapore.
Sumala sa mga eksperto, ang breast cancer mao gihapon ang nag-unang klase sa kanser nga makaigo sa mga Filipina, busa gidasig ang kababayen-an sa kanunay nga pagpasusi ug sayong pagpakonsulta aron malikayan ang grabeng epekto sa sakit.
Photo Courtesy to: GMA News Online
