Atol sa unang tuig nga serbisyo sa Juander Radyo Digos 99.7 FM, dako unta ang among kalipay nga mahatagan kamo ug libre nga serbisyo pinaagi sa “Kinasing-Kasing nga Serbisyo Publiko” isip pasalamat sa inyong walay hunong nga suporta.
Apan tungod sa kusog nga linog nga miigo Hunyo 8,2026, nakahukom nga ang maong kalihokan kanselahon sama sa libreng gupit, manicure, pedicure, ug massage aron masiguro ang kaluwasan sa tanan—sa mga bisita, mga volunteer, ug sa tibuok pamilyang Juander Radyo Digos.
Bisan pa man, wala mapalong ang among tinguha sa pagserbisyo. Ang mga pagkaong among giandam sama sa arroz caldo, ice cream, burgers, ug pack lunch among giapod-apod ngadto sa katawhan sa nagkadaiyang bahin sa Digos City aron sa among gamayng paagi, mapadayon gihapon ang diwa sa pagpakabana ug pag-alagad.
Gipasalamatan sa tanang Ka Juander nga misabot ug midawat sa among desisyon. Salamat sa inyong pagsabot ug sa pag-una sa kaluwasan sa tanan. Labaw na sa mga nitunga pa sa sayo ug sa mga gikan pa sa halayong mga lugar sa Davao del Sur nga naghinam-hinam unta makapahimulos sa among serbisyo publiko.
Usahay adunay mga panghitabo nga wala nato damha, apan nagtuo kami nga adunay maayong rason ang tanan. Labaw sa tanan, nagpasalamat kita sa atong Labawng Makagagahum sa pagpanalipod ug paggiya sa matag usa ug sa matag pamilya niining higayona.
Sa among unang anibersaryo, usa ka kamatuoran ang among gihuptan sa kasingkasing: wala unta maabot sa Juander Radyo Digos kining unang tuig sa pagserbisyo kung dili tungod kaninyong tanan.
Salamat sa inyong gugma, pagsalig, ug walay paglubad nga suporta.
Happy 1st Anniversary, Juander Radyo Digos 99.7 FM!
Padayon kitang magtinabangay, mag-alagad, ug magpakabana sa usag usa.
Daghang salamat, mga Ka Juander!
