Gikumpirma sa Ateneo de Manila University ang pagpanaw sa student-athlete nga si Rene Clert Baterbonia human kini nalumos atol sa usa ka team-building activity sa Dipaculao Hunyo 8, 2026.
Sumala sa unibersidad, lakip usab sa nakabsan sa kinabuhi ang iyang kauban nga si Divine Adili. Ang insidente nahitabo atol sa kalihokan sa ilang grupo sa maong lungsod sa Aurora.
Si Baterbonia usa ka atleta gikan sa Davao ug nailhan isip kanhing Most Valuable Player (MVP) sa mga kompetisyon sa eskwelahan. Bag-o lang usab siya nakatambong sa Palarong Pambansa 2026 diin iyang girepresentar ang Davao Region sa basketball ug nakadaog og silver medal.
Sa pahayag sa unibersidad, gipadayag niini ang pagpakigduyog sa mga pamilya ug higala sa duha ka estudyante nga namatay. Nagpadayon usab ang mga otoridad sa pag-imbestigar sa nahitabong insidente.
Naghinuktok karon ang komunidad sa sports ug edukasyon sa pagkawala sa duha ka batan-ong atleta nga adunay dakong potensyal sa ilang natad.
Photo Courtesy: x.com
