Nasakmit sa mga sundalo sa 403rd Infantry Brigade ubos sa 4th Infantry Division ang duha ka high-powered firearms ug mga kagamitang pang-giyera human sa nahitabong sangka batok sa mga salin sa Communist Terrorist Group (CTG) didto sa Sitio Mahawan, Barangay Busdi, Malaybalay City, Bukidnon niadtong Hunyo 6. Ang maong kalampusan dako og natabang sa pagpahuyang sa operasyon ug lohika sa mga rebelde sa probinsya.
Nahitabo ang 20 minutos nga sinukliay sa bala sa dihang naengkwentro sa tropa sa kagamhanan ang armadong grupo, diin napugos sa pag-ikyas ang mga rebelde ug nabiyaan ang ilang duha ka M16A1 rifles ug mga subersibong dokumento.
Hiniusang gihimo ang maong operasyon sa batalyon lakip na ang 1st Special Forces Battalion, 26th IB, 88th IB, ug 8th IB nga padayong nagpatuman sa kahapsay ug kaluwasan sa dapit.
Tungod niini, dungan nga nanawagan silang Brigadier General Seigfred Tubalado ug Major General Marion Angcao ngadto sa mga nahabiling miyembro sa CTG nga mobalik na sa sabakan sa balaod ug ayaw usiki ang kinabuhi sa sayop nga idolohiya.
Giawhag sa mga opisyal ang mga rebelde nga pahimuslan ang mga programa sa gobyerno sama sa Enhanced Comprehensive Local Integration Program kun E-CLIP aron makabaton og malinawon ug hapsay nga kinabuhi uban sa pamilya.
Photo Courtesy: 4th Infantry Division
