Gikumpirma sa Philippine Ambassador ngadto sa Estados Unidos nga si Jose Manuel Romualdez nga gikanselar sa gobyerno sa US ang diplomatic ug tourist visas ni Martin Romualdez.
Sa iyang mensahe ngadto sa media niadtong Biyernes, miingon si Ambassador Romualdez nga nakumpirma na ang kanselasyon sa mga visa apan wala siya’y dugang detalye mahitungod sa hinungdan niini. Ang embahador ug ang kongresista mag-ig-agaw.
Samtang, mibalibad usab ang US Embassy sa Manila sa paghatag og dugang impormasyon kabahin sa maong lakang.
Matod sa embahada, tungod sa mga lagda sa pagpanalipod sa visa records, dili sila mahimong mokomento sa indibidwal nga mga kaso sa visa o sa espesipikong aksyon nga gihimo sa US Department of State.
Nahitabo ang kanselasyon sa visa human ibasura sa Sandiganbayan ang hangyo ni Romualdez nga tangtangon ang precautionary hold departure order nga gipahamtang batok kaniya.
Ang maong order nalambigit sa nagpadayon nga imbestigasyon kabahin sa giingong iyang kalambigitan sa kontrobersiyal nga flood control project scandal.
Sa pagkakaron, wala pa mopagawas og opisyal nga pahayag si Romualdez bahin sa kanselasyon sa iyang mga visa ug sa desisyon sa korte.
Photo Courtesy: Inquirer.net
