Nagpagawas og opisyal nga pahimangno ang DepEd Davao del Sur, human sa pagkaylap sa usa ka impormasyon sa social media nga ilang giklaro nga fake news ug wala gikan sa bisan unsang opisyal nga komunikasyon sa Department of Education (DepEd).
Sumala sa DepEd Davao del Sur, ang maong post nga naglibot online gikan sa Facebook page nga Edukasyon News: PH, nga wala’y kalabutan o opisyal nga koneksyon sa DepEd. Busa, gidasig sa ahensya ang publiko nga magmatngon ug sigurohong tinuod ug napamatud-an ang impormasyon sa dili pa kini ipaambit o tuohan.
Gipahinumdoman usab sa DepEd ang mga ginikanan, estudyante, magtutudlo, ug katawhan nga magsalig lamang sa mga opisyal nga plataporma sa ahensya alang sa lig-on ug kasaligan nga mga anunsyo ug impormasyon may kalabotan sa edukasyon.
Lakip sa mga opisyal nga panid nga girekomenda sa DepEd mao ang:
• DepEd Philippines
• DepEd Region XI
• DepEd Davao del Sur
Nanawagan usab ang DepEd sa tanan nga motabang sa pagpugong sa pagkaylap sa sayop nga impormasyon pinaagi sa pagpaambit lamang sa mga balita ug pahibalo nga gikan sa opisyal nga mga tinubdan.
