Gilunsad ang Community-Based Implementation of the Resiliency Management Training (RMT) Program, usa ka bag-ong inisyatibo sa administrasyon ni Gov. Raul Mabanglo pinaagi sa Rapid Mobilization Task Force (RMTF). Ang pagbansay gihimo sa PJRB Inland Resort sa Monkayo, Davao De Oro niadtong Hunyo 4 ngadto sa 5.
Tumong niini nga mapalalom ug mapaabot sa komunidad ang kahibalo sa disaster resiliency, lakip na ang early warning systems, risk communication, disaster reporting, first aid, emergency care, ug uban pang mga pamaagi sa pag-atubang sa katalagman.
Matod ni Salvador Nadayag Jr. sa Rapid Mobilization Task Force RMTF Maco, kini ang unang higayon nga sila mismo ang nagdumala ug nagpasayon sa maong seminar ug training. Gipadayag usab niya ang ilang kadasig sa pagpaambit sa ilang nakat-onan ngadto sa mga barangay ug purok aron mas mapalig-on ang kahandam sa komunidad.
Sa unang hugna sa programa, gibansay ang 37 ka mga purok leaders ug mga kagawad gikan sa Barangay Poblacion ug Barangay Baylo.
Usa sa mga partisipante, si Amalia Ondelaman sa Purok 2-B, Barangay Poblacion, nagpahayag sa iyang pagpasalamat nga naapil siya sa maong pagbansay. Matud niya, dako ang iyang nahibal-an bahin sa disaster preparedness ug kung unsaon pag-atubang sa mga emerhensya ug kalamidad.
Sumala sa Provincial Disaster Risk Reduction and Management Office, sinugdanan pa lamang kini sa mas dako nga plano sa pagpalapad sa programa ngadto sa 237 ka mga barangay sa tibuok probinsya. Gilauman nga pinaagi niini, mas mapaspas ug mas epektibo ang pagresponde sa mga komunidad panahon sa mga katalagman ug emerhensya.
