Gitumbok sa Department of Education (DEPED) Region 9, nga usa sa mga hinungdan sa ubos nga lebel sa reading comprehension sa pipila ka mga Senior High School learners mao ang kapobrehon.
Matod ni DEPED 9 Assistant Regional Director Gregorio Cyrus Elejorde, ang kakulang sa pinansyal nga kapasidad sa pamilya makaapekto sa pagkat-on sa mga estudyante tungod kay daghan ang makasinati ug kagutom ug di maka-concentrate sa pagtuon.
Giingon pa ni ARD Elejorde, nakatampo usab sa maong problema ang epekto sa learning loss atol sa pandemya, kakulang sa regular nga pagbasa, ug huyang nga pundasyon sa pagbasa sukad pa sa unang mga ang-ang sa pagkat-on sa mga kabataan sa rehiyon.
Giingon sab niya, nga palig-on sa DepEd 9 ang ilang mga reading intervention programs aron matabangan ang mga estudyante nga mapalambo ang ilang reading comprehension ug mas maandam alang sa mas taas nga lebel sa edukasyon.
Kahinumduman, una nang gi-critic ni ACT Teachers Party List Representative Antonio Tinio isip “failure” ang implementasyon sa Senior Highschool Program gumikan sa resulta sa Edcom nga anaa sa 87 percent sa mga tinun-an ang na categorized nga naglisod sa reading comprehension.
