Naangol ang tulo ka overseas Filipino worker (OFW) sa nahitabong drone strike sa Kuwait International Airport. Lakip ang tulo ka OFW sa kapin 60 ka tawo nga nangaangol tungod sa insidente nga nahitabo niadtong Hunyo 3.
Nagdala usab og dakong kadaot sa mga bilding sa airport ang nahitabong airstrike. Matod sa Department of Migrant Workers (DMW), duha sa tulo ka OFW ang natambalan na dayon samtang ang usa kinahanglan pa nga tahi-un ang mga samad sa iyang kamot ug ulo.
Gipahayag usab ni DMW Secretary Hans Leo Cacdac nga nabisita na sa Migrant Workers Office ang mga nangasamdang OFW ug nakagawas na usab kini sa tambalanan.
Hugot usab nilang gibantayan ang mga pinakabag-ong kalamboan sa nasod. Gihikay na usab nila ang pagpa-uli sa mga apektadong OFW sa Kuwait.
Una nang gihimakak sa Iran nga sila ang nagpaluyo sa pag-atake, ug matod pa, ang mga interceptor missile sa US ang nasayop og igo hinungdan nga diretso kini nga nitugpa sa airport.
Photo courtesy: Kuwaiti News Agency (KUNA)
