Gipahibalo ni Department of Agriculture spokesperson Arnel de Mesa nga naggahin na ang ahensya ug dugang nga P25 million nga pondo alang sa fuel subsidy sa mga mag-uuma sa tibuok nasod.
Matod ni De Mesa, kini dugang pa sa P150 million nga pondo nga una nang gipagawas sa Department of Budget and Management alang sa mga mag-uuma ug mananagat.
Gilauman nga sugdan na sa DBM karong buwana ang proseso sa pagpagawas ug pag-apod-apod sa maong ayuda pinaagi sa DA. Gipasabot ni De Mesa nga importante nga madali ang paghatag sa subsidy tungod kay daghang mag-uuma ang naggamit na og mga makinarya alang sa umaabot cropping season.
Tumong sa cash fuel assistance program nga maminusan ang epekto sa pagsaka sa presyo sa produktong petrolyo nga giingong resulta sa tensiyon ug kagubot sa Middle East.
Ubos sa programa, matag kwalipikadong mag-uuma makadawat og P5,000 nga fuel subsidy, ug ang dugang nga pondo gilauman nga makabenepisyo sa kapin 5,000 ka mag-uuma sa nasod.
Samtang, sumala ni Agriculture Secretary Francisco Tiu Laurel, ang maong sistema makatabang aron masiguro nga ang ayuda mahatag lamang sa lehitimong mga benepisyaryo sumala sa gilatid sa General Appropriations Act.
Dugang pa ni De Mesa, mokabat na sa P10 billion gikan sa Presidential Assistance for Farmers and Fisherfolk ang napagawas sa gobyerno aron suportahan ang sektor sa agrikultura ug pangisda.
Photo Courtesy: Inquirer.net/PNA
