Naghatag og dugang nga proteksyon ang Department of Labor and Employment (DOLE) Zamboanga del Sur ngadto sa 20 ka probationers ug parolees nga nakabenepisyo sa DOLE livelihood kits.
Segon ni DOLE Zamboanga del Sur Provincial Director Miraflor Casanes, gawas sa mga livelihood kits nga ilang nadawat, gi-apilan usab ug bayad sa ilang buhatan ang isa ka tuig nga insurance coverage sa mga benepisyaryo nga misumatotal sa P1.2 million nga livelihood kit package.
Dugang ni Casanes, tumong niini nga masiguro nga adunay manalipod sa mga benepisyaryo batok sa posibleng aksidente ug uban pang wala damhang panghitabo samtang nagpadagan sa ilang panginabuhian.
Segon niya, ang maong inisyatiba kabahin sa paningkamot sa ahensya nga dili lamang maghatag og kapital ug kagamitan, kondili apil usab ang seguridad aron mas molambo ang mga negosyo sa mga probationers ug parolees.
Malaumon usab si PD Casanes nga pinaagi niini, mas mahimong produktibo ang mga benepisyaryo sa pagpalambo sa ilang panginabuhi ug sa ilang pagbalik sa komunidad isip responsableng mga indibidwal.
