Gipasigarbo sa Department of Education (DepEd) 9 ang maayong performance sa mga atleta sa Zamboanga Peninsula atol sa bag-ohay lang nahuman nga Palarong Pambansa 2026 nga gipahigayon sa Agusan del Sur.
Matod ni DEPED 9 Regional Director Ronelo Al K. Firmo, kini na ang usa sa pinakamaayong resulta nga nahimo sa rehiyon human makakolekta og 17 ka gold medal, kumpara sa miaging tuig diin tulo lamang ka gold medal ang naangkon sa Zamboanga Peninsula.
Gipasabot ni Firmo nga gipakita sa mga atleta ang taas nga lebel sa disiplina, dedikasyon ug sportsmanship bisan pa sa kusog nga kompetisyon gikan sa ubang mga rehiyon sa nasod.
Bisan sa mga hagit nga ilang giatubang ug sa presensya sa daghang lig-on nga mga kakompetensya, nakahatag gihapon og dungog sa rehiyon ang mga atleta pinaagi sa ilang talento ug paningkamot sa nagkadaiyang sporting events.
Dugang pa niya, ang maong kalampusan usa ka timaan sa padayon nga paglambo sa grassroots sports development ug sa pagpalig-on sa kabatan-onang atleta sa Zamboanga Peninsula.
Samtang gipasalig ni RD Firmo nga mas palig-onon pa nila ang sports development pinaagi sa mas intensive training ug paghimo ug sayo nga preparasyon aron mapabilin sa ikanapulo nga rank ang Zamboanga Peninsula o mas labaw pa sa sunod nga national competition nga pagahimoon sa Quezon City.
