Nag-atubang og dakong pagsaway ang kapulisan sa United Kingdom human mamatay ang 18-anyos nga estudyante nga si Henry Nowak sa usa ka insidente sa paglaslas og kutsilyo didto sa Southampton, Southern England, nga gisundan pa sa kontrobersiya sa aksyon sa mga pulis sa eksena.
Si Nowak nasamdan ug nadunggaban sa maong insidente niadtong Disyembre sa miaging tuig ug namatay tungod sa grabeng samad sa kalawasan.
Ang suspek nga si Vickrum Digwa, 23-anyos, nasentensiyahan og life imprisonment human mapamatud-an nga namakak siya sa pulis ug miangkon nga si Nowak maoy miatake kaniya sa usa ka giingong racist attack.
Sa footage sa body camera, makita si Nowak nga naghigda sa dalan, samtang nangayo og tabang ug nag-ingon nga dili na siya kaginhawa, apan gitubag siya sa usa ka pulis nga “murag wala ra ka masamdan, amigo,” bisan pa sa klaro niyang kahimtang nga grabe ang samad.
Ang maong hitabo nakapukaw og kasuko sa publiko ug nagpatunghag pangutana sa pagresponde sa kapulisan, labi na sa giingong epekto sa alegasyon sa rasismo sa ilang pagdumala sa insidente.
Miingon si British Prime Minister Keir Starmer nga adunay seryosong mga pangutana nga kinahanglan tubagon, ilabi na sa proseso sa desisyon sa kapulisan sa maong sitwasyon.
Gikondena sa pamilya sa biktima ang giingong dili matarong nga pagtratar, samtang naghangyo usab sila nga dili gamiton ang kamatayon sa ilang anak aron sa pagpahinungod og dugang panagbingkil.
Gipahimangnoan sa mga opisyal sa UK nga ang tanan patas sa balaod ug kinahanglan malikayan ang politikal nga pagpahimulos sa trahedya, samtang padayon ang imbestigasyon sa kapulisan.
Photo Courtesy: GMA
