Giaprobahan sa Kamara de Representantes sa ikatulo ug katapusang pagbasa ang House Bill No. 9465 o ang Digital Media Anti-False Information Act, nga nagtumong sa pagsumpo sa organisado ug tinuyoang pagpakaylap og bakak nga impormasyon sa digital platforms.
Sa botong 286-3 ug pito ka abstention, gipasar sa mga magbabalaod ang maong panukalang balaod nga naglatid og silot nga pagkabilanggo sulod sa unom ngadto sa 12 ka tuig ug multa nga gikan P500,000 hangtod P2 milyon alang sa mga mapamatud-ang tinuyoang naghimo, nagpondo, o nagpalapad og sayop nga impormasyon nga makadaot sa publiko o makahatag og hulga sa nasudnong seguridad.
Target usab sa panukala ang mga troll farm, bot networks, fake accounts, ug AI-generated nga mga hulagway, video ug audio nga gipasundayag isip tinuod aron makalimbong sa publiko.
Matod ni House Majority Leader Sandro Marcos, tumong sa balaod ang pagpanalipod sa mga Pilipino batok sa mga grupo ug indibidwal nga naggamit sa bakak nga impormasyon aron manipulahon ang opinyon sa publiko ug makahatag og kadaot sa komunidad.
Gipasiugda usab ni Speaker Bojie Dy nga dili target sa maong panukala ang kritisismo, oposisyon, peryodismo, o matinud-anong sayop, kondili ang tinuyoan ug organisadong paglimbong nga makadaot sa katawhan ug sa demokrasya.
Photo Courtesy: wikipedia
