Nagpadayon karon ang pag-develop sa tulo ka lain-laing bakuna batok sa Ebola virus, tungod sa nagkagrabe nga pagkaylap sa Democratic Republic of Congo (DR Congo) ug mga kasikbit nga lugar. Sumala sa mga health experts, ang maong outbreak nakapatay na og hapit 250 ka indibidwal.
Miabot na sa kapin 1,000 ka suspected cases ang ginabantayan sa mga health authorities, samtang adunay siyam ka kumpirmadong kaso sa Uganda. Ang outbreak giingon nga nagsugod sa usa ka lugar nga limitado ang pasilidad sa healthcare mao nga paspas ang pagkatag sa sakit.
Tulo ka research groups ang kasamtangan nga nagbuhat sa bakuna nga makatabang batok sa Ebola nga Bundibugyo. Lakip niini ang International Aids Vaccine Initiative, Moderna, ug University of Oxford, nga gisuportahan sa Coalition for Epidemic Preparedness Innovations (CEPI).
Sumala sa mga eksperto, ang Ebola adunay lain-laing klase, ug ang matag usa nagkinahanglan og lahi nga bakuna. Kining Bundibugyo type wala pa’y aprubado nga vaccine, mao nga naglisud ang mga otoridad karun sa pagpugong niini.
Photo Courtesy:ABC News
