Subling napukaw ang garbo sa lungsod sa Maitum Sarangani Province human nagmalampuson ang gipahigayon nga Thematic Mass Dance Competition, diin mipakita sa mabulukong kultura, kabilin, ug madasigong pasundayag ang nagkadaiyang mga barangay sa bag ohay lang nga nahuman nga Binuyugan Festival.
Pinaagi sa hapsay nga mga lihok, gamhanang koreograpiya, ug makabibihag nga pagsaysay, buhing gidalit sa mga partisipante ang sugilanon sa sinugdanan sa Maitum. Kini mao ang mabulukong istorya sa usa ka Prinsesa sa tribong Tboli ug sa iyang hinigugma nga manggugubat, kinsa maisugong mitabok sa makusog nga sulog sa Suba sa Saub sa ilang pagpangita sa kagawasan, kaisog, ug gugma luyo sa kapungot sa amahan sa prinsesa nga mao ang Datu.
Gawas nga usa ka hugot nga kompetisyon, ang maong kalihokan nahimong usa ka mahinungdanong selebrasyon sa kabilin nga nagpahinumdom sa tibuok komunidad sa mithi sa kaisog, sakripisyo, ug kalig-on nga maoy nag-umol sa kasaysayan sa lungsod.
Sa pagtapos sa maong aktibidad, opisyal nga nadeklarar nga Champion ang grupong Halimuyak nga gilangkuban sa Brgy. Mabay, New La Union, Tuanadatu, Zion, ug Pangi.
Nasundan kini sa grupong Sidlakan (Brgy. Malalag, Kalaneg, Upo, ug Kiayap) isip 1st Runner-Up, grupong Sinagtala (Brgy. Old Poblacion, Sison, Wali, Kiambing, ug Batian) isip 2nd Runner-Up ug grupong Bulalayaw (Brgy. Kalaong, Maguling, Mindupok, Ticulab, ug Pinol) isip 3rd Runner-Up.
Photo Courtesy: Maitum Youth Development
