Gisugdan na sa Social Security System (SSS) ang sayo nga pagpatuman sa ikaduhang bahin sa ilang Pension Reform Program. Imbis nga sa Septiyembre pa kini unta sugdan, gipagula kini karong Hunyo aron makahatag dayon og daling tabang sa anaa sa 4.1 ka milyon nga mga pensioners nga nag-atubang sa kalisod tungod sa kamahal sa mga palitonon ug kuryente.
Matod pa ni Finance Secretary Frederick Go ug SSS President Robert Joseph de Claro, mokabat sa P6 bilyon nga dugang benepisyo ang ipang-apod-apod gikan karong Hunyo hangtod Agusto 2026.
Tumong niini nga mahatagan og dinalian nga kaayohan ang mga retirado ug ang ilang pamilya taliwala sa nagpadayong kalisod sa inadlaw-adlaw nga galastohan.
Ubos niining bag-ong eskedyul, ang mga pensioners nga narekord na sa listahan sukad niadtong Mayo 31, 2026 makadawat na sa mas taas nga pension sugod karong Hunyo 1. Samtang kadtong mga bag-ong ma-aprubahan ang pension gikan Hunyo 1 hangtod Agusto 31, 2026 makadawat sa ilang adjusted nga pension sugod karong Septiyembre 1.
Photo Courtesy: Business Diary
