Hugot ang panawagan sa minority bloc o Solid Bloc 11 (SB 11), nga gipangulohan ni Senate Minority Leader Vicente Sotto III, nga pabalhinon o paluwaton si Senate President Alan Peter Cayetano sa iyang pwesto. Matod sa minoriya, gibiyaan ug gipasagdan sa mayorya ubos ni Cayetano ang ilang mga responsibilidad ug gipanglapas ang mga opisyal nga lagda sa institusyon.
Gihatagan og gibug-aton sa minoriya nga dili pwedeng mohunong ang trabaho sa Senado tungod lang sa pagdumili sa presiding officer sa pagpangulo. Gilapas matod pa ni Cayetano ang Rule XIV, Sec. 41 sa Rules of the Senate, diin gikinahanglan una ang pagkonsulta sa Majority ug Minority Leader sa dili pa i-postpone o i-undang ang sesyon, nga giisip nila nga usa ka dakong pagpangbastos sa katawhan.
Gibutyag usab ni Senador Juan Miguel Zubiri ug Senador Raffy Tulfo nga daghang miyembro gikan mismo sa mayorya ang nagpadala og mensahe kanila tungod sa kalibog ug reklamo sa wala pagpahigayon og sesyon. Tungod niini, giawhag sa minoriya ang mga kaubanan sa mayorya nga mobalhin ug moduyog sa ilang bloke aron matul-id ang dagan sa Senado.
Isip tubag, mipahayag si Cayetano nga andam siyang munaog sa iyang katungdanan bisan unsang orasa o adlawa kon mapakitaan siya og 13 ka senador nga nagkahiusa batok kaniya. Ang iya lamang hangyo nga ang 13 ka magbabalaod mamahimong mga lider nga andam makigbisog alang sa kamatuoran nga maghatag og kagawasan sa mga Pilipino.
Photo courtesy: Senator Risa Hontiveros/ Facebook
