Gidid-an na sa Department of Defense sa Amerika ang mga magsisibya sa pagsulod sa press office sa Pentagon human kini giisip nga classified space o Sensitive Compartmented Information Facility. Sumala ni acting Pentagon press secretary Joel Valdez, gihimo ang lakang tungod kay ang mga speechwriter gikan sa Office of the Secretary of War, nga kanunay naggamit og mga classified nga materyal, ang kauban sa pasilidad. Gipasabot ni Valdez nga normal lang kini ug walay angay ikapangutana o ikakontrobersyal sa desisyon.
Kini nga kausaban nahitabo dungan sa nagka-grabe nga tensyon tali sa media sa Estados Unidos ug sa ikaduhang administrasyon ni Presidente Donald Trump, nga miabot na gani sa mga korte. Kaniadto, gawasnon nga makalihok ang mga reporter sa Pentagon, apan niadtong Oktubre sa miaging tuig, kadaghanan sa mga media outlet ang miuli sa ilang mga access badge isip pagsupak sa mga bag-ong restriksyon sa gobyerno sa ilang pagpanarbaho.
Tungod niini, nikiha na usab ang mantalaang The New York Times batok sa Department of Defense sa ikaduhang higayon sulod sa lima ka bulan aron hagiton ang patakaran nga kinahanglang duna silay kaubang escort sa tanang higayon sulod sa Pentagon. Giisip sa mantalaan nga kini nga patakaran naglapas sa First Amendment ug usa ka unconstitutional nga pamaagi aron babagan ang independente nga pagbalita sa militar, samtang ang gobyerno nagpadayon pa usab sa ilang pag-apela sa korte human sa mga naunang desisyon sa maghuhukom.
Photo courtesy: AP News
