Gikondena ni Senador Ping Lacson ang giingong plano sa National Bureau of Investigation o NBI, nga pa-subpoenahon ang asawa ni Senador Ronald “Bato” dela Rosa, isip kabahin sa ilang imbestigasyon may kalabutan sa pagpangita sa senador.
Sa iyang pahayag, giingon ni Lacson nga dili propesyonal ug usa ka trabahong-tinamad ang pag-lakip sa asawa ni Dela Rosa, aron masubay ang lokasyon sa senador.
Matod pa niya, nagpakita kini og kakulang sa intelligence work sa ahensya. Sa laing bahin, gipasabot sa NBI nga wala nagtumong ang subpoena sa direktang pagpangita kang Dela Rosa, kundili kabahin lamang kini sa imbestigasyon sa usa ka giingong text message nga gipadala sa asawa sa senador ngadto kang Senate President Alan Peter Cayetano, niadtong Mayo 13.
Padayon usab nga gisusi sa NBI, ang posibilidad nga adunay koneksyon ang insidente sa pagpamusil sa Senado sa giingong pag-ikyas ni Dela Rosa ug kung kinsa ang posibleng nagmando niini.
Samtang nagpadayon ang imbestigasyon, nagkainit usab ang debate sa publiko bahin sa limitasyon sa mga lakang sa mga otoridad ug sa pagpanalipod sa katungod sa mga pamilya nga wala direktang nalambigit sa kaso.
Photo Courtesy: Philippine News Agency/x.COM
