Padayon gihapon sa iyang pag-duty ang personahe sa Traffic Management Center (TMC) luyo sa kontrobersyal nga video online sa pakiglalis niini tali sa usa ka multicab driver sa Malaybalay City, Bukidnon niaging Mayo 31, 2026
Matod ni Traffic Operation Officer III Agustin Cepeda, sa pakighinabi ning sibyahan nga sa kasamtangan, padayon pa nilang giimbestigaran ang tinuod nga nahitabo sa maong insidente aron mahatagan og husto nga disposisyon ang duha ka habig.
Giklaro usab ni Cepeda nga duna silay gipatuman nga “15-seconds rule” ilabina diha sa sulod sa yellow box sa syudad. Tuyo sa maong lagda nga mapahibalo ang publiko ug malikayan ang pagpundo sa mga sakyanan nga maoy hinungdan sa pagkahuot sa dagan sa trapiko.
Gihangyo karon sa maong buhatan ang pagsabot sa mga drayber samtang gipangitaan og dinalian nga solusyon ang maong isyu. Sa pagkakaron, gipahinumdoman sa TMC ang tanang mga motorista nga mosunod kanunay sa mga patakaran sa trapiko aron malikayan ang susamang lalis sa kadalanan
Sa pikas bahin, gitumbok sa multicab driver nga si Faith Clyde Ubalde nga ang iyang pag-video ug pag-upload sa insidente dili pamaagi sa pagpakaulaw, kondili pagdepensa sa iyang kaugalingon human siya kalit nga gisita, gipahawa, ug dinalian nga gitiketan sa dihang miabot siya sa yellow box aron mokuha og pasahero. Nasakitan matod pa siya tungod kay wala man lang siya hatagi og higayon nga makapadayag sa iyang dapit. Hagit niini nga ipagawas ug ipakita sa publiko ang CCTV footage sa maong dapit aron masuta sa tanan kung unsa gayod ang tinuod nga nahitabo sa maong insidente.
Photo Courtesy: TMC
