Nagpahimangno ang Estados Unidos sa Oman batok sa bisan unsang plano nga magpahamtang og toll o bayad sa pag-agi sa Strait of Hormuz, usa sa pinakabisyong ruta sa transportasyon sa lana sa kalibutan.
Matod ni U.S. Treasury Secretary Scott Bessent, hugot nga targeton sa US ang bisan kinsang indibidwal o grupo nga direkta o dili direktang moapil sa pagpatuman sa toll, ug pagahamtangan og silot.
Gibutyag usab ni US President Donald Trump nga walay usa ka nasod ang angay hatagan og kontrol sa Strait of Hormuz, nga giila nga kritikal nga agianan sa global nga suplay sa lana.
Bisan pa niini, wala pa’y opisyal nga pahayag ang Oman bahin sa giingong joint control sa Strait uban sa Iran. Apan giingon nga nakig-istorya ang Oman sa Iran bahin sa kaluwasan ug kagawasan sa paglawig sa maong ruta.
Ang Strait of Hormuz giisip nga usa sa pinakainit nga chokepoint sa global trade, kay dinhi moagi ang dakong porsyento sa suplay sa lana sa tibuok kalibutan.
Photo Courtesy:BBC
