Nibahad si US President Donald Trump nga posibleng atakehon sa United States ang Oman kung dili kini magtarung o “mag-behave.”
Gibuhat ni Trump ang maong pahayag human sa mga report kabahin sa giingong negosasyon tali sa Iran ug Oman. Sumala sa mga report, giplanohan sa duha ka nasud ang pagpahamtang og toll sa mga barkong moagi sa Strait of Hormuz nga maoy usa sa labing importanteng ruta sa pagbiyahe sa mga oil tanker sa kalibutan.
Dugang pa sa report, temporaryong nasira ang maong agianan sukad nagsugod ang gubat sa US ug Israel batok sa Iran. Una nang gipahibalo ni Trump nga pag-ablihon pag-usab ang Strait of Hormuz alang sa tanang barko ug giingon nga walay nasud nga adunay katungod sa pagkontrol niini.
Sa pagkakaron, wala pay opisyal nga pahayag gikan sa White House kabahin sa kontrobersyal nga komento ni Trump, samtang wala usab motubag ang Embahada sa Oman sa Washington may kalabotan sa maong isyu.
Photo courtesy: Anadulo Anjasi
