Gipahimangno sa Japanese bank nga MUFG nga posibleng maapektuhan pag-ayo ang ekonomiya sa Pilipinas tungod sa tulo ka dakong risgo nga mahimong mopugong sa pagtubo sa ekonomiya sa nasod.
Sumala sa bangko, apil ang Pilipinas sa mga nasod sa Asya nga pinaka-bulnerable sa kombinasyon sa “Super El Niño,” taas nga interest rates sa Estados Unidos, ug kawalay kasiguruhan sa lokal nga mga polisiya.
Una nga risgo ang posibleng Super El Niño nga mahimong mopataas sa presyo sa pagkaon ug enerhiya nga mahimong mosangpot sa mas taas nga inflation.
Ikaduha, posible pa umanong mosaka ang interest rates sa US Federal Reserve nga mahimong makaapekto sa investments ug merkado sa Asya.
Ikatulo, ang domestic policy uncertainty nga mahimong hinungdan sa pagkunhod sa capital inflows ug paghuyang sa piso.
Giingon usab sa MUFG nga kauban sa India ug Indonesia, ang Pilipinas usa sa mga nasod nga labing maigo kung magkahiusa ang maong tulo ka risgo.
Matod ni Bangko Sentral ng Pilipinas Governor Eli Remolona Jr., dako’g papel ang inflation data sa Mayo nga ipagawas karong Hunyo 5 sa sunod desisyon sa BSP kung magpataas ba usab sila sa interest rates.
Giingon usab niya nga ginatan-aw pa sa BSP kung kinahanglan ba dayon magpatuman og dugang rate hike o hulaton nalang ang sunod regular nga meeting sa Monetary Board.
Photo Courtesy:INQUIRER.NET
