Gipasiugda sa mga eksperto sa kahimsog ang importansya sa pagmintinar sa maayong panglawas ug kaangayan sa mga empleyado ilabi na batok sa stress nga kasagarang resulta sa trabaho sama sa daghang buluhaton, taas nga oras sa duty ug lisod nga deadlines.
Sumala sa World Health Organization o WHO, ang stress maoy mental tension nga mahimong resulta sa lisod nga sitwasyon, ug kon mosobra mahimo kining hinungdan sa lainlaing problema sa panglawas sama sa sakit sa ulo, insomnia, obesity ug sakit sa kasingkasing.
Subay usab sa tambag sa Centers for Disease Control and Prevention o CDC, importante nga maghatag ang mga employer og access sa mga pasilidad ug programa nga makapadasig sa physical activity sa mga trabahante.
Lakip sa girekomenda ang pagpahigayon og sports activities, fitness programs ug mga kompetisyon aron mapadasig ang mga empleyado sa paglihok ug pag-ehersisyo.
Gipasiugda usab sa mga eksperto nga dakong hinungdan sa stress ang kagubot ug kawalay organisasyon sa opisina. Busa, importante nga limpyo, organisado ug hapsay ang workplace aron mahimong komportable ug produktibo ang mga empleyado.
Girekomenda usab ang pagbutang og personal nga gamit sama sa litrato, artwork o dekorasyon sa lamesa o opisina aron makatabang sa pagpamenos sa stress ug makahatag og positibong pagbati sa lugar-trabaho.
Ang maong pahimangno kabahin sa pagsaulog sa National Employee Health and Fitness Day nga nagtumong sa pagpalambo sa kahimsog ug kaayohan sa mga trabahante.”
Photo Courtesy: MCL Medics
