Gikuhaan sa Korte Suprema (SC), ang usa ka retirado nga clerk of court gikan sa Agusan del Norte, sa iyang mga benepisyo sa pagretiro human kini nadiskobrehan nga mibiyahe siya paingon sa Dipolog City, gamit ang ngalan sa usa ka court stenographer.
Sumala sa Office of the Spokesperson sa Korte Suprema, ang korte suprema nagpagawas ug desisyon nga per curiam nga naghukom nga si Clerk of Court II Luzviminda Hernandez sa Municipal Trial Court (MTC) sa Buenavista, Agusan Del Norte, sad-an sa serious dishonesty, falsification of official documents, ug gross misconduct ubos sa 2025 Code of Conduct and Accountability for Court Officials and Personnel (CCACOP).
Tungod kay ang silot nga pagkatangtang sa serbisyo nga resulta sa iyang compulsory retirement niadtong Oktubre 2024 dili mapahamtang, gimando sa SC ang pagkuha sa tanan niyang mga benepisyo sa pagretiro, gawas sa natipon nga leave credits.
Dili usab siya mahimong ibalhin o patrabahuon sa bisan unsang opisina sa gobyerno, lakip ang mga government-owned or controlled corporations (GOCCs),” matod sa Office of the Spokesperson.
Ang kaso naggikan sa usa ka administrative complaint nga gisang-at sa court stenographer nga si Maritess Yamba.
Si Yamba gikatakda unta nga motambong sa usa ka kombensiyon para sa mga stenographer sa korte sa Dipolog City gikan Abril 26 hangtod 28, 2003.
Nakahukom si Yamba nga dili na mopadayon sa pagtambong sa kombensiyon, bisan pa man nga ang lokal nga gobyerno sa Buenavista ang miabaga sa mga galastuhan sa tanang stenographer sa korte, lakip na ang mga bayranan sa rehistrasyon ug per diem.
Sa pagkahibalo niini, si Hernandez nagpahayag sa iyang interes nga mouban aron makigkita sa mga opisyal sa First Level Clerks of Court Association of the Philippines.
Tungod niini, gipangutana ni Hernandez si Yamba kung mahimo ba niyang gamiton ang ngalan sa stenographer, apan hugot nga midumili si Yamba.
Sa katapusan, nadiskobrehan ni Yamba nga bisan wala siya motambong sa kombensiyon, usa ka sertipiko sa pagtambong ug resibo sa pag-ila nga nagkantidad og PHP 3,400 ang giisyu ubos sa iyang ngalan. Napamatud-an nga si Hernandez aktuwal nga miadto sa kombensiyon sa Dipolog City, apan iyang gipeke ang iyang Daily Time Record (DTR) aron ipakita nga misulod siya sa opisina.
Dugang pa, usa ka tseke nga nagkantidad og (PHP 11,448) nga unta para kang Yamba ang giisyu apan gidawat kini ni Hernandez ug nakabenepisyo.
Photo Courtesy: Rappler
