Nagpatawag ug press conference si Senator Juan Miguel “Migz” Zubiri sa Bukidnon kagahapon Mayo 27, 2026 aron tubagon ang mga pagsaway ug reaksyon sa pipila ka katawhan kabahin sa iyang pagpasakop sa Minority Bloc sa Senado.
Atol sa iyang pamahayag, emosyonal nga giingon ni Zubiri nga nasakitan siya sa mga batikos nga iyang nadungog gikan sa pipila ka residente sa probinsya.
“Ako makigpatay ko para sa Bukidnon,” matod sa senador samtang nagpasabot sa iyang gugma ug dedikasyon alang sa katawhan sa lalawigan. Gihangyo usab niya ang publiko nga tagaan siya og higayon aron mapakita nga padayon siyang molihok ug motabang alang sa kaayohan sa Bukidnon ug sa mga lumolupyo niini.
Anaa sa maong presscon ang presensya ni Quezon Municipal Mayor Pablo “Poling” Lorenzo III kinsa mipadayag ug suporta ngadto sa Senator nga matud pa dugay nang nasaksihan sa mga taga-Bukidnon iyang serbisyo nga giingong prayoridad ang kaayohan sa katawhan.
Dugang sa Mayor nga nasabtan niya ang mga isyung giatubang sa senador sa Senado ug gipasabot nga para kaniya, ang mga aksyon niini nakatutok sa interes sa Bukidnon busa gipasalig niya uban sa mga Mayores sa Bukidnon ilang 100% nga pagbarog alang sa padayong pag-alagad sa senador.
