Giaprubahan na sa House of Representatives sa ikaduhang pagbasa ang House Bill 9390, ang balaodnon nga magtukod og College of Medicine sa Bukidnon State University (BukSU) nga nahimutang sa dakbayan sa Malaybalay.
Nagtinguha ang maong balaodnon sa pag-establisar sa BukSU-College of Medicine, nga mag-unang magtanyag og Doctor of Medicine Program gamit ang “learner-centered” ug “community-oriented” nga pamaagi. Gawas niini, mandato usab sa maong tunghaan ang paghimo og mga research ug extension services aron mapalig-on ang healthcare system sa nasod.
Pinaagi ni Bukidnon 2nd District Rep. Jonathan Keith Flores, ang maong lakang dakong tabang aron masulbad ang kakuwang sa mga doktor sa Bukidnon, sa rehiyon sa Northern Mindanao, ug sa uban pang hilit nga dapit sa Pilipinas. Mapadali ug mas mabarato na usab ang edukasyong medikal alang sa mga aspiring nga doktor gikan sa Mindanao tungod kay dili na nila kinahanglan nga sa layong lugar motungha.
Gilantaw ni Flores nga ma-transmit ang bill ngadto sa Senado sa dili pa matapos ang unang regular session sa 20th Congress. Mapasalamaton ang kongresista tungod kay mas duna nay igong higayon ang mga senador sa pagtuon niini kon itandi niadtong Pebrero 2025 diin napadala ang unang bersyon pipila na lang ka semana sa wala pa natapos ang 19th Congress.
Kung maaprobabahan kini, paningkamotan nga mapondohan ang pag-comply sa CHED standards pinaagi sa 2027 ug 2028 national budgets uban sa tabang sa LGUs sa Bukidnon
Photo Courtesy: Bukidnon State University
