Opisyal nga gihangyo sa National Bureau of Investigation (NBI) ang Philippine National Police (PNP) nga kanselahon ang mga permit sa armas nga gituohang narehistro sa ngalan ni Senador Ronald Dela Rosa. Mokabat sa 100 ka firearms ang gilakip sa report, lakip ang high-powered weapons sama sa automatic rifles ug shotgun, nga giingong nagbutang kaniya sa kahimtang nga “armed and dangerous.”
Sumala sa NBI, padayon ang koordinasyon sa PNP aron ma-review ug kanselahon ang mga lisensya kung mapamatud-an nga sakop kini sa kaso.
Miuyon usab ang Department of Justice nga gilauman nga dali ra kanselahon ang mga lisensya sa armas ni Dela Rosa, kay ang pagpanag-iya niini giila nga pribilehiyo ug dili katungod. Miingon si Justice Secretary Fredderick Vida nga makig-istorya siya sa PNP chief aron mapadali ang aksyon.
Hisayran ang International Criminal Court mi-isyu usab og warrant of arrest batok sa senador may kalabutan sa alegasyon nga crimes against humanity nga konektado sa drug war operations. Giila sa gobyerno ang bisa sa maong warrant.
Photo Courtesy: abs-cbn
