Nagpakaaron-ingnon isip dance troupe ang mga Police sa Thailand aron madakpan ang usa ka suspek atol sa usa ka pampublikong pista, nakakuha og atensyon sa social media ang talagsaong operasyon.
Matod sa report, lima ka lalaki ug usa ka babayeng police officer ang nagsul-ob og sequined performance dresses, nag-full makeup, ug misalmot sa pista isip mga mananayaw aron dili mahalata sa target nga ilang dakpon.
Samtang nagpasundayag ug sayaw taliwala sa daghang tawo, hinay-hinay silang miduol sa suspek hangtod nakaabot sa gilay-on nga igo na alang sa pagdakop. Didto dayon nila gigapos ang suspek atol sa ilang performance.
Human sa malampusong operasyon, mikatag dayon sa social media ang mga hulagway sa mga police officer nga nagsul-ob gihapon sa ilang costumes.
Sa laing insidente niadtong Pebrero 2026, usa usab ka grupo sa Thai police ang migamit og lion dance costume aron masikop ang usa ka bangiitang kawatan nga giakusahan sa pagpangawat sa balay sa usa ka senior police commander sa Nonthaburi Province.
Duha sa mga police officer ang nagtago sulod sa lion costume samtang ang uban nagsul-ob og tradisyonal nga sinina aron makasulod sa Lunar New Year temple fair nga wala makapukaw og pagduda.
Wala na nakaamgo ang suspek sa nahitabo hangtod nga gisikop na siya sa mga awtoridad.
Photo Courtesy: WION
